Liebi Chromosömli
Wenn öbber froggt, worum sinn ihr schwarz - kamme saage, s’ isch well mir kai anderei Idee g’haa hän – jo!
Aber es het mir g’hai Ruhe gloo und i ha miesse studiere:
Sujet Interpretation:
Dunggli Zytte sin das gsi,
verändert hett daas di und mi,
Us Frind sind scho fascht Finde worde
Fyr säll, so main i, gyts kai Orde!
Doch jetzt wo’s nur no «Schnuppe» isch,
liggts näggscht Probleem scho uff em Tisch
E Virus kah me hyt jo näh-
e’m dumme Russ – so aim, isch nit z’ vergäh!
Drumm klassisch farbig luschtig si,
isch schwär und bruucht no Zyt soglii.
Mir blybe schwarz, verhüllt wie Schätte
wo uff d’ Gasse useträtte.
Bis zämme mir, so wie mir stöhn
in Baiz eine go schnappe göhn.
Denn ziehn mir unseri Larve ab
und föhn is avo spiihre
Kai Schatte meh - es isch verbi
E G’sicht kunnt hindeführe.
E Mensch wo lacht und farbig isch
So macht’s mir widder Freud,
-das ich darf mit Euch zämme sy,
ha’n ich no nie bereut!
Uff em Waage wo e Liecht sott stoh
Do wahie hytte Fätze,
s’isch Zyt wo’s uns nit het zuegloh
E besseri Lambbe z’setze.
Doch wenn’s aim fählt was me vermisst,
Isch’s wichtig das meh’s nit vergisst,
en Erinnerig macht’s denn wach,
und so isch es e gueti Sach.
Für mi isch’s Sujet drumm so guet
Well’s wider zu’n is passe duet,
und am Schluss, es isch kai Hohn,
Isch’s Fasnacht Interpretation!
Eppilog:
Widder emol hämmer dr Naagel uff dr Kopf troffe mit unserem Sujet, und wieso, well’s ussere Aifachheit kunnt – aber au uss dr diefschte Seel und us em Härz.
Was uns vereiaint: d’ Freud an dr Fasnacht? Jo- aber au die Art vo Fasnacht mache wo numme bi uns mögligg isch und so viil Freiheit losst.
Schöni Fasnacht! Vom Stefi Mesmer
Comments